Hematofesti foi unha idea de Miguel A. López (O Hematocrítico), Ledicia Costas e Alberto Vázquez. Apenas empezáramos a pensar no proxecto, cando Miguel faleceu de maneira inesperada. Pouco tempo despois, decidimos que seguir adiante co festival era o mellor xeito de continuar co seu traballo e unha forma de preservar o seu legado e manter viva a súa memoria.

En novembro de 2024 tivo lugar a primeira edición, baixo a dirección de Ledicia, a co-dirección de Alberto e a produción de Llerena Perozo, e foi unha loucura marabillosa. Como todo o que rodeaba sempre a Hemato!

Hematofesti entrou directamente no Informe do Observatorio de la Cultura coma unha das novidades culturais máis relevantes de 2024 e recibiu unha resposta extraordinaria por parte do público e da prensa, ademais do incuestionable apoio de patrocinadores e colaboradores.

Así que aquí está a edición 2025, ateigada de propostas para encher Vigo e o mundo de creatividade, diversión… e humor, moito humor, mentres seguimos convidando a todas as persoas a mirar sempre o mundo con ollos de neno.